वस्तीतले धडपडे : राजेंद्र नगरचे सुपर स्ट्रायकर दादाराव शिंदे
कामाच्या रगाड्यातही आपला छंद जोपासता येतो आणि एवढंच काय, त्याच्या बळावर आपली ओळखही बनवता येते, याचं जिवंत उदाहरण म्हणजे दादाराव शिंदे.
नितीन गांगर्डे
दादाराव शिंदे हे एक हौशी कॅरमपटू आहेत. आपलं पोटापाण्याचं काम सांभाळत त्यांनी कॅरम खेळण्याची आपली आवड जोपासली आहे. एकाग्रता, स्ट्रायकरवरची पकड आणि एकदा स्ट्रायकर हातात आला की खेळ संपवून टाकायचा, ही दादारावांची खासियत आहे. खेळात मिळवलेल्या प्राविण्यामुळे दादाराव अनेक स्पर्धांमध्ये खेळत असतात आणि बक्षिसंही मिळवत असतात. पुणे महापालिकेच्या कर्मचाऱ्यांमध्येही त्यांनी या खेळाच्या जोरावर आपली ओळख तयार केली आहे.
दादारावांचे वडील पुणे महानगरपालिकेमध्ये सफाई कर्मचारी म्हणून काम करत होते. वडिलांच्या निवृत्तीनंतर त्यांची जागा दादारावांना मिळाली. महापालिकेच्या सेवेत ते रुजू झाले. एकीकडे काम आणि दुसरीकडे कौटुंबिक जबाबदाऱ्या, यामुळे त्यांना कॅरमकडे पूर्ण लक्ष देता येईना. पण कॅरम खेळण्याचा आपला छंद सोडायचा नाही, हे त्यांनी मनाशी पक्कं ठरवून टाकलं. त्यामुळे कामाच्या जोडीला त्यांनी कॅरम खेळणं सुरूच ठेवलं. दिवसातले दोन ते तीन तास ते कॅरमसाठी देतात. त्यांच्या खेळावर त्यांचे सहकारीही इतके खुश असतात, की कामाच्या वेळी स्पर्धा असेल तर त्यांचे सहकारी, ‘तू जा, आम्ही सांभाळतो' असं म्हणतात.
आज इतक्या वर्षांनंतरही दादारावांची कॅरमची आवड तसूभरही कमी झालेली नाही. राष्ट्रीय खेळाडू बनण्याचं त्यांचं स्वप्न आहे. सरावासाठी अधिक वेळ दिला, तर आपण राष्ट्रीय खेळाडू बनू असा विश्वासही त्यांना वाटतो.
पुण्यातल्या वस्त्यांमधील कॅरमप्रेमी दादारावांना कॅरमपटू म्हणूनच ओळखतात. कचरा वाहतुकीचं काम करत त्यांनी कॅरममध्ये प्राविण्य मिळवलं, ही कौतुकास्पद बाब आहे. त्यांच्यासारख्या होतकरू खेळाडूंना महापालिकेने प्रोत्साहन भत्ता द्यायला हवा. मदत करायला हवी. प्रोत्साहन द्यायला हवं.
- शिवाजी नरसुडे, मुकादम, वानवडी घनकचरा व्यवस्थापन विभाग, पुणे.
अंक - डिसेंबर 2021
टिप्पण्या
टिप्पणी पोस्ट करा