वस्तीतले धडपडे : वस्तीतून बॉक्सर घडवणारे प्रशिक्षक विजय गुजर

एका सामान्य कुटुंबातल्या बॉक्सरने अनेक होतकरू मुलांना बॉक्सिंगचे धडे दिले. त्यातले अनेक खेळाडू राष्ट्रीय स्पर्धांमध्येही चमकले आहेत. 

नितीन गांगर्डे

काशिवाडी-भवानी पेठ भागामध्ये विजय गुजर यांचा बॉक्सिंग प्रशिक्षक म्हणून नावलौकिक आहे. गेली 22 वर्षं विजय सर माफक दरात आणि ज्यांची आर्थिक परिस्थिती नाजूक आहे अशा खेळाडूंना मोफत बॉक्सिंग शिकवतात. त्यांनी आतापर्यंत शेकडो बॉक्सर घडवले आहेत. ते म्हणतात, “बॉक्सिंग ही एक कला आहे, आणि मी एक कला शिकवतो.”

विजय गुजर यांचा जन्म काशिवाडीतला. शिक्षण सरकारी शाळेमध्ये झालं. पाचवीत असताना त्यांना बॉक्सिंगची आवड लागली. त्या काळात त्यांनी अनेक स्पर्धांत सहभाग घेऊन बक्षिसं पटकावली. एवढंच नव्हे तर राष्ट्रीय स्पर्धेतही त्यांनी सुवर्ण, रौप्य आणि कांस्यपदकं मिळवली. याशिवाय प्रतिष्ठेची समजल्या जाणाऱ्या राज्य अजिंक्यपद बॉक्सिंग स्पर्धेतही सुवर्ण आणि रौप्यपदकाची कमाई केली. 

राष्ट्रीय खेळाडूंना सरकारी नोकऱ्यांमध्ये आरक्षण असतं. त्यामुळे विजय सरांनी खेळाडू कोट्यातून रेल्वे भरतीसाठी अर्ज केला. ते सांगतात, “रेल्वेमधल्या अधिकाऱ्यांनी नोकरीसाठी लाच मागितली. म्हणून मी सरकारी नोकरीचा नाद सोडला आणि मुलांना बॉक्सिंग शिकवायचं ठरवलं.”

विजय सरांनी 2000 मध्ये भवानी पेठेत बॉक्सिंग समर कॅम्प सुरू केला. वस्तीतल्या मुलांची ऊर्जा लहानपणापासूनच चांगल्या गोष्टींसाठी वापरली गेली तर त्यांचं भविष्य चांगलं घडू शकतं हे विजय सरांना ठाऊक होतं. म्हणून ते मुलांच्या घरी जाऊन त्यांच्या पालकांना खेळाचं महत्त्व सांगू लागले. शाळेतल्या विद्यार्थ्यांना भेटू लागले. त्यामुळे समर कॅम्पसाठी भरपूर मुलं जमली. यातली बहुतेक मुलं कष्टकरी कुटुंबांतली होती. त्यामुळे सरांनी कॅम्पची फी माफक ठेवली; पण खर्च तर येणारच होता. मग या कॅम्पसाठी तत्कालीन आमदार रमेश बागवे यांनी आर्थिक मदत केली.

बरेच लोक फक्त खेळातल्या अनुभवाच्या आधारे प्रशिक्षक होतात; पण विजय सरांनी मात्र मुलांना तंत्रशुद्ध बॉक्सिंग शिकवण्यासाठी आंतरराष्ट्रीय बॉक्सिंग संघटनेचं प्रशिक्षण घेतलं. एका छोट्या समर कॅम्पपासून बॉक्सिंग प्रशिक्षण सुरू केलेल्या विजय सरांच्या मुशीतून आतापर्यंत चारशेहून अधिक राज्यपातळीवरचे आणि सत्तरहून अधिक राष्ट्रीय बॉक्सर घडले आहेत, तर त्यांनी घडवलेला एक खेळाडू आंतरराष्ट्रीय पातळीवरही चमकला आहे. या कामगिरीमुळे महानगरपालिकेने विजय सरांना उत्कृष्ट क्रीडा प्रशिक्षक या पुरस्काराने गौरवलं. सर सांगतात, “मला यातून फारसे पैसे मिळत नाहीत. घर चालवण्यासाठी मी एका कंपनीत नोकरी  करतो; पण बॉक्सिंग शिकवण्यातून मिळणारं समाधान मोठं आहे. माझे खेळाडू मेडल मिळवतात, त्यांची वाहवा होते त्यातून मला बॉक्सिंग शिकवत राहण्याची प्रेरणा मिळते.”

“विजय गुजर सर हे माझे बॉक्सिंगमधले गुरू आहेत. त्यांनी मला तंत्रशुद्ध बॉक्सिंग शिकवल्यामुळेच मी राष्ट्रीय स्पर्धेत पदक मिळवू शकलो. त्यांना खेळाडूंच्या परिस्थितीची जाणीव आहे. ते वेळोवेळी गरजू खेळाडूंना मदत करत असतात.” 

- रेनॉल्ड जोसेफ, राष्ट्रीय बॉक्सिंग खेळाडू  

अंक - ऑगस्ट 2022